Saturday, March 14, 2015

ජ්‍යෝතිෂ ගු(හො)රු


Image result for horoscope readersජ්‍යෝතිෂ ගු(හො)රු .....

පහු ගිය පෝස්ටු දෙක තුනම ඉස්කෝලේ කාලේ වෙච්චි දේවල් නිසා, ඉන්දරේ කල්පනා කලා පොඩ්ඩක් ඉස්කෝලෙන් එලියට පැනල , විශ්ව විද්‍යාල කාලේ මතක පොත අවුස්සන්න. ඔන්න මම ඔය කියන කාලේ වෙනකොට මටත් තිබ්බ මගේම වුන මගේම ආදරයක්.... හැබැයි, මගේ ප්‍රියම්බිකාව හිටියේ වෙන විශ්ව විද්‍යාලයක.

සතියට සැරයක් දෙසරයක් විසිට් එක දාලා ශේප් කර ගත්තේ නැත්තම්, නිකට දණහිස්සේ ගෑ වෙන්න මූණ එල්ල ගන්න හින්ද, මාත් ඉතින් බස් දෙක තුනක එල්ලිලා බඩ ගානවා කෙල්ලව බලන්න. හැබැයි අහන උන්ට මම කියන්නේ, “මාගේ මේ ව්‍යායාමය හුදෙක් මල් කැඩීම උදෙසාම නොවෙයි... එය අන්තර් විශ්ව විද්‍යාලයීය සහයෝගීතාව උදෙසාමයි” ... කියල. 

අර කව්දෝ කිව්වලු “ආදරෙත් හරියට පට්ට ඇඹුල් බිලිං ගෙඩියක් වගේ.. කන උන්ගේ දත් හිරි වැටිලා, හකු පූට්ටු වෙනවා. ඒත් බලා  ගෙන ඉන්න උන්ගේ කටට කෙල උනනවා” කියල.... ඔන්න ඉතින් මම කෙල්ලව බලන්න කන කට්ට, මගුල් සක්වලේ කරනම් ගැහීමක් විදිහට දැකපු එවකට තනිකඩව හිටපු හොඳම ෆ්රෙන්තෙකුටත් ඕනි උනා කරත්තයක් දක්කන්න.

කෙල්ලෙක් ඉස්සරහ වෙව්වලන්නේ නැතිව හිට ගන්න බැරි ගය්යා ( කතා නායක මගේ ෆ්රෙන්තා), මොන විදිහට ඇහුවද මම දන්නේ නෑ...හැබැයි ආදරය ප්‍රකාශ කරලා අපේ බැච් එකේම කෙල්ලෙකුට. ඒ කෙල්ලගෙනුත් කොල්ලෙක් අහල තියෙන්නේ ජීවිතේ මුල්ම වතාවටද කොහෙද, කල බල වෙච්ච පාර, මෙකි එක පාරටම බෑ ගාලා...

හැබැයි උදේ මේ සිද්ධිය උනා කියමු... හවස් වෙද්දී කෙල්ලට තේරුණා කරපු ගොන් කමේ තරම..ඔන්න මට පාස් වුනා කියමුකෝ පණිවිඩේ, කෙල්ල කැමතියි කියල. මම ඉතින් ගියා ගය්යාගේ බෝඩිමට, බ්‍රේකින් නිව්ස් එක දෙන්න. මම හිතුවේ කෙල්ලගෙන් බූට් පාර කාලා, මේකා ඇඳ බදා ගෙන පත බෑවිලා ඇති කියල.  මෙන්න මේකා ටියුට් එකක් කරනවා..

“ආ ඉන්දරේ... මොකෝ හදිස්සියේ” .. පොරගේ කතාව නිකන් මොකුත්ම නොව්න ගානට. “මචන්.. උඹ ඇහුවලු නේද කෙල්ලගෙන්..” මමත් දැම්ම මුට්ටිය...”ඔව් බන්..එකී බෑ කිව්වා” ... 
“ගය්යා... මට කෙල්ල එවල තිබ්බා පණිවිඩයක්..... එකී කිව්වා....” කොහෙද..මට ඉවර කරන්න දෙන්නේ නෑ .. මේකා පනිනවා මැද්දට... “ අවුලක් නෑ ඉන්දරේ ... මම ඒකිත් එක්ක තරහ නෑ...” .... ගය්යගේ හිතේ මම ඒකගේ හිත හදන්න ආවා කියලා... මට පට්ට මල.
“ මේ... %^$#&^ පුතෝ.. උඹ මේ මගුලක් කතා කරනවා.., අන්න ඒකි උඹට කැමතියි ලු..” සුද්ද සිංහලෙන්ම කියන කල් ඉතින් මේකා මට කතා කරන්න දුන්නෙම නෑනේ.... චූන් එක වැඩි වෙලා, පොර ඇඳ උඩට පැනපු පාර, තව පොඩ්ඩෙන් ඔලු කට්ට ඉස් මුදුනෙන්ම ගැලවිලා යනවා මාළු පෙත්ත වගේ... උඩ තිබ්බ ෆෑන් එකට....

ඔන්න ඉතින් ඒකත් ජයසිරි මංගලම් කියලා,   ඒ ලව් ඉස්ටෝරියත් ගලාගෙන යනවා මහවැලි ගන් කොමලිය වගේ..පොඩි පොඩි ගල් පර, වංගු බෑවුම් තිබ්බට, ලොකු සීන් නෑ... ශේප් එකේ යනවා..කෙල්ල ගෙදරටත් කිව්ව කියමුකෝ... කෙල්ලගේ අම්ම ඉල්ලලා ඒවලා තිබ්බ කොල්ලගේ හඳහන... ඒත් අපි බැලුවා, කොල්ල කළුද සුදුද දකින්නත් කලින්, හඳහන් ඉල්ලන්නේ අහවල් එකටද කියල...කෙල්ල කියන විදිහට කෙල්ලගේ අම්මල කේන්දර පිස්සෝ... 

කොහොමත් ඉතින් උගත් බුද්ධිමත් උපාධි අපේක්ෂකයින් විදිහට, කිරල මැනලා මිසක් තීරණ ගැනීමේ පුරුද්දක් අපිට ඒ කාලේ ඉඳලම තිබ්බේ නැහැ.ඒක හින්ද පෙර සූදානමක් විදිහටකෙල්ලගේ කේන්දරේ ගෙන්නලා දැම්ම පොඩි චෙක් අප් පාරක්, ඒ කාලේ හිටපු නම ගිය කේන්දර කාරයෙක්ට කියල. පැණි වරක ගහටත් හෙන ගහපි කියන්නේ, ඔන්න කේන්දර බලපු ගුරා කියපි, “ ලොවෙත් ගැලපෙන්නේ නෑ.. ඇරත් දරු පළත් නැහැ” කියල...
දැන් ඉතින් මොකද කරන්නේ.. ජෝඩුව ඉන්නවා, ආච්චි මලා වගේ ෆුල් සික් ගහල...

“මචන්ලා.. කේන්දර ඇත්ත වෙන්නත් පුළුවන්...බොරු වෙන්නත් පුළුවන්... හැබැයි, උඹල බඳිනවා නම්, ඇත්ත උනත් අවුලක් නෑ කියල හිත හදා ගෙන බඳින්න ඕනි ” ... කියන්න ඕනි එක මම කියල දැම්මා... 
“ ළමයෙක් නම් අරන් හදා ගන්න බැරිය ඉන්දරේ... අපිට එකතු වෙන්න තියනවා නම් ඒ ඇති.. ඒත් කේන්දර බලවපු ගමන් අපේ අම්ම නම් කීයට වත් මේකට ඉඩ දෙන්නේ නෑ  ” ... කෙල්ල ටැප් එක ඇරිය ඔන්න...

අම්ම මොක කිව්වම මොකද ජෝඩුව එක හිතින් නම්... ඉන්දරේ එන්ටර් උනා සීන් එකට... දවස් දෙකයි ගියේ..කෙල්ලගේ කේන්දරේ දීලා හැදෙව්වා ගය්යට අලුත් කේන්දරයක්... ආයෙත් පොරොන්දම් නම් පොරොන්දම්... වෙන ඒවා නම් ඒවා..ගැලපෙනවා කියන්නේ ඉතින් ලොවෙත් අවුලක් නැහැ...

ඔන්න ඉතින් කෙල්ලගේ අම්ම කේන්දර බැලෙව්වා.. එක තැනකින් නෙමෙයි ,,දෙතුන් තැනකින්...බලපු උන් හැමෝම කිව්වලු....උන්ගේ ජීවිත කාලේ හම්බ උන හොඳම ගැලපෙන කේන්දර දෙක...මේක නම් නෝනා කොහොමවත් අත අරින්න එපා කියල. 

කාලේ පියාඹල ගිහින්, දෙන්නගේ මගුල් දවසත් ආව කියමුකෝ... ජෝඩුව සමු ගන්න කොට අම්ම තාත්තා බදා ගෙන හිටියට වඩා වෙලා මාව බදා ගෙන හිටිය. හේතුව දන්නේ මායි, මගේ ප්‍රියම්බිකාවයි, ඒ ජෝඩුවයි විතරයි...

අදටත් උන් දෙන්න අපේ හොඳම යාලුවෝ.... උන් මාර ආතල් එකේ,,,ෆුල් ජොලියේ ඉන්නවා... දන්නවද හොඳම සීන් එක... උන්ට ඉන්නවා ,,, බෝනික්කියෝ වගේ කෙලි පැටික්කියෝ,,, එක්කෙනෙක් නෙමෙයි දෙන්නෙක්ම....

කොහොමද ඔරිජිනල්  කේන්දරේ බලපු මුල්ම කේන්දර කාරයා ගේ බයිලාව... අනිවා..පොර අර (හිටපු) රාජකීය කේන්දර මෑන් “සුමනේ” වගේ පොරක්...  හැබැයි ඉතින් ගය්යව අවුස්සන්න ඕනි උනාම මම කියන්නේ “ මචෝ.. කෝකටත් පොඩි උන්ගෙයි උඹෙයි DNA ටෙස්ට් එකක් කර ගත්තොත්  මොකෝ” කියලා... විහිළුවට හොඳේ.....

1 comment:

  1. සර් හරිම ලස්සනට ලියලා තියෙනවා, තව තවත් ලස්සනට සර් ගේ ජීවන අත්දැකීම් ලියන්න ශක්තිය ලැබේවා!සුබ පැතුම්

    ReplyDelete